ИРГЭДИЙН АНХААРАЛД !

Улсын бүртгэлийн ерөнхий хуулийн 6 дугаар зүйлийн 6.5-д “Иргэний үнэмлэхийг бусдад шилжүүлэх, барьцаалах, зориуд гэмтээх, хууль бусаар ашиглах, хуурамчаар үйлдэхийг хориглоно”, Улсын бүртгэлийн ерөнхий хуулийн 6 дугаар зүйлийн 6.8-д “Монгол Улсын иргэн төрийн болон хувийн хэвшлийн байгууллагаас үйлчилгээ авахад иргэний үнэмлэхээ ашиглаж болно”, Монгол Улсын Засгийн газрын 2018 оны 12 дугаар сарын 26-ны өдөр баталсан   “Монгол Улсын иргэний үнэмлэхийн дүрэм”-ийн 3.2-т “Иргэн нь иргэний үнэмлэхийг гэмтээх,  бусдад барьцаалуулах, хууль тогтоомжид зааснаас бусад этгээд бусдын үнэмлэхийг төвлөрүүлэн хадгалах, барьцаалж авах, гэмтээх, ашиглахыг хориглоно”, 3.3-т “Гээгдсэн иргэний үнэмлэхийг олсон хүн түүнийг 72 цагийн дотор улсын бүртгэлийн асуудал хариуцсан төрийн захиргааны байгууллагын орон нутаг дахь газар, хэлтэс, тасагт мэдэгдэж хүлээлгэн өгнө” гэж тус тус заасан байна.

Мөн Зөрчлийн тухай хуулийн 15.24 дүгээр зүйлийн 2-т “Иргэний үнэмлэх, энгийн гадаад паспорт, улсын бүртгэлийн гэрчилгээг барьцаалсан, барьцаалуулсан, зориуд гэмтээсэн бол хүнийг хорин таван нэгжтэй тэнцэх хэмжээний төгрөгөөр, хуулийн этгээдийг хоёр зуун тавин нэгжтэй тэнцэх хэмжээний төгрөгөөр торгоно” гэж заасан.

Иймд иргэний баримт бичиг, улсын бүртгэлийн гэрчилгээг үндэслэн үйлчилгээ үзүүлдэг болон барьцаалан зээлдүүлэх үйл ажиллагаа явуулдаг, худалдаа үйлчилгээ эрхлэгч аливаа иргэн, хуулийн этгээд нь дээр дурьдсан хуулийн заалтыг хэрэгжүүлэн ажиллахыг мэдэгдье.